ගිගාබයිට් ගාණක තඩි ගොනුවක් (file) බාගත (download) කළාට පස්සෙ ඒක හානි (corrupt) වෙලා තිබ්බොත් කොහොම ද? නිතර පාහේ බාගත කිරීම් කරන අයට නම් මේක එච්චර අමුතු දෙයක් නෙවෙයි. හැබැයි අපි ඉඳල ඉඳල පෙරුම් පුරල බාගත්ත file එකකට කෙළ වුණොත් අවුල්නෙ නේද?
හැබැයි නිතර ටොරන්ට් (torrents) විදිහට ගොනු බාගත කරන අයට මේ වගේ දේ වෙන්නෙ බොහොම කලාතුරකින්. ඒකට හේතුව තමයි BitTorrent ප්‍ර‍ොටොකෝලය වැඩ කරන අපූරු ක්‍රමය.
BitTorrent වලදි, ඔයා බාන්නෙ තනි ගොනුවක් උණත්, ඇත්තට ම වෙන්නෙ ඒ ගොනුව පොඩි පොඩි කොටස් විදිහට වෙන වෙන ම බෑවිලා අන්තිමට ඔක්කොම එකතු වෙන එක. හරියට කුටීර ගණනාවක් තියෙන මී වදයක් වගේ. මේ හැම කොටස ම හරියට බෑවුණා ද, නැත්තම් දෝෂ තියෙනව ද කියල වෙන වෙන ම හොයා බැලෙනව. ඒ නිසා හැම කොටස ම හරියට බෑවුණාට පස්සෙ හැදෙන file එක හරියට ම හරි, දෝෂ නැති එකක්.
ඍජු බාගතයක දි (direct download) සාමාන්‍යයෙන් වෙන්නෙ ගොනුව මුල ඉඳල අගට බාගත වෙන එක. IDM වගේ වැඩසටහන් ගොනුවෙ කෑලි බෙදාගෙන සමාන්තර ව (parallely) ඉක්මනට බාගත කරන එක ඇත්ත, නමුත් එක එක කෑල්ලෙ නිවැරදිතාව වෙන වෙන ම හොයන්න විදිහක් නෑ. ඒ නිසා ගොනුවට කෙළ වුණොත් ආයෙ මුල ඉඳන් බාගත කරන්න ම වෙනව, මුළු ගොනුවෙ ම නිවැරදිතාව ස්ථිර කරගන්න.
හැබැයි පොඩි ජිල්මාට් එකක් දාල, BitTorrent වල කෙරෙන වැඩේ සාමාන්‍ය ගොනුවකටත් කරන්න පුළුවන්. එහෙම කළොත් කෙළවුණ ගොනුවෙ කෙළවුණ කොටස විතරක් ආපහු බාගත කරල වැඩේ ගොඩ දාගන්න පුළුවන්. දත්තත් ඉතුරුයි, කාලෙත් ඉතුරුයි.
ගොනුව ලැබුණෙ කොහෙන් ද කියන එක වැදගත් නෑ; කෙළින් ම බාගත්ත, ටොරන්ට් විදිහට බාගත්ත, යාලුවෙකුගෙන් ඉල්ලගත්ත, ඕනැ ම ගොනුවක් ඔට්ටුයි!
වැඩේ කරන්නෙ මෙහෙමයි:
- කෙළවුණ ගොනුවට ගැලපෙන ටොරන්ටුව හොයා ගන්න.
- දැන් මේ ටොරන්ට් ගොනුව (
.torrentදිගුව (extension) තියෙන) බාගත කරගෙන ඔයාගෙ ටොරන්ටු ක්‍රමලේඛයට (torrent client) දා ගන්න. - දැන් ටොරන්ටුවේ ඇතුළෙ තියෙන ගොනු ටික බාගත වෙන්න නියමිත තැන හොයා ගන්න.
- දැන් එතන හැදිල තියෙන දත්ත ගොනුව වෙනුවට, ඔයා ළඟ තියෙන කෙළවුණ ගොනුව එතනට දාන්න.
- දැන් ටොරන්ටු ක්‍රමලේඛයට ගිහින් බලන්න, ටොරන්ටුවේ බාගත ප්‍රතිශතය (download percentage) වැඩි වෙලා ද කියල.
- ප්‍රතිශතය හරිගියාම, ජාලයට සම්බන්ධ වෙලා ටොරන්ටුවෙ ඉතිරි ටික බෑවෙන්න දෙන්න.
මේක ටිකක් පරිස්සමින් කරන්න ඕනි. චිත්‍රපට වගේ නම් එක ම චිත්‍රපටයේ ගුණාත්මක ව වෙනස් (උදා. විභේදනය (resolution), ප්‍රභවය (source; DVDRip, BRRip වගේ) ප්‍රභේද (versions) සෑහෙන්න තියෙනවා. වෙන ජාතිවල ගොනු උණත් එහෙමයි. හොඳ ම වැඩේ, ඔයා ළඟ දැනට තියෙන ගොනුවේ නම ම torrent කියන වචනයත් එක්ක සෙවුම් යන්ත්‍රයකට (search engine) දෙන එක. ගොනුව
1_the_movie_2015_brrip_1080p.mkvනම් ගූගල් සෙවුමට
torrent "1_the_movie_2015_brrip_1080p.mkv"වගේ ප්‍රශ්නයක් (query) දැම්මොත් ගොඩක් දුරට වැඩේ ගොඩ දාගන්න පුළුවන්. ("" එක්ක හෙවුවම හරි ගියෙ නැත්නම් ඒව අයින් කරල බලන්න.)
වැඩේ හරියට ම හරි ද කියල දැන ගන්න, ටොරන්ටුව ඇතුළෙ තියෙන ගොනුවෙ ඇත්ත නමයි ඒකෙ විශාලත්වයයි (size) ඔයා ළඟ තියෙන එකට ගැලපෙන්න ඕනි. (විශාලත්වය සමහර විට පොඩ්ඩක් වෙනස් වේවි, හැබැයි මුල් ගොනුව ටොරන්ටුවකින් ම බාපු එකක් නම් විශාලත්වය වෙනස් වෙන්න තියෙන ඉඩ ගොඩක් අඩුයි.) ගොඩක් ටොරන්ටු අඩවි, ටොරන්ටුවට අදාල පිටුවේ ඒක ඇතුළෙ තියෙන ගොනුවල නම් හා විශාලත්වයන් පෙන්නනවා, ඒ නිසා අවුලක් වෙන එකක් නැහැ.
කොටින් ම කිවුවොත්, ඔයා ළඟ තියෙන ගොනුවට හරියට ම ගැලපෙන ටොරන්ටුව කොහොම හරි හොයා ගන්න වෙනව; නැත්නම් වැඩේ හරි යන්නෙ නෑ.
ගොඩක් වෙලාවට .torrent ගොනුව විවෘත කළාම මේක ඉබේ ම සිද්ධ වෙනව.
මේක ටොරන්ටු ක්‍රමලේඛයේ සැකසුම්වල (settings) ඇති. (සාමාන්‍යයෙන් ඔයාගෙ බාගත ගොනු (Downloads) ෆෝල්ඩරය (folder) ඇතුළෙ හරි ඒ ඇතුළෙ ටොරන්ටුවෙ නමින් හැදෙන අලුත් ෆෝල්ඩරයක් ඇතුළෙ හරි තමයි වැඩේ සිද්ද වෙන්නෙ.)
මේ ගොනු දෙක ම එක නමින් තියෙන නිසා කළින් තියෙන ගොනුව ප්‍රතිස්ථාපනය (replace) වේවි. සමහර විට ටොරන්ටුවෙන් හැදෙන ගොනුවෙ අගට .part වගේ කොටසක් එකතු වෙලා තියේවි, එතකොට අපේ ගොනුවෙ නමත් ඒ විදිහට වෙනස් වෙන්න ඕනි.
වැඩේ හරි නම් ප්‍රතිශතය සාමාන්‍යයෙන් 99% හෝ ඊට වැඩි ගාණකට ගිහින් තියෙන්න ඕනි. මේ ගාන ගොනුවේ කෙළවීමේ තත්ත්වය මත වෙනස් වෙයි, හැබැයි ඇත්තට ම ජාලයෙන් මුකුත් බෑවෙන්න කලින් ම ප්‍රතිශතය 0%ට වැඩි ගාණකට යන්න ඕනි; නැත්තම් වැඩේ ගොඩ දාන්න බෑ.
එහෙම වෙලා නැත්තම් බාගතය නවතලා (pause/stop) නැවත අරඹල බලන්න.එහෙමත් නැත්තම් ක්‍රමලේඛය වහල (close) අායෙ විවෘත කරල බලන්න. (සමහර ක්‍රමලේඛ වැහුවට කාර්ය තීරයෙ (task bar) හැංගිලා ඉන්නව; ඒ වගේ වෙලාවට එතැනටත් ගිහින් ඒක සම්පූර්ණයෙන් වහල දාන්න.)
වැඩි ම වුණොත් මෙගාබිටු (megabytes) කීපයකින් වැඩේ සම්පූර්ණ වෙයි. ගොඩක් වෙලාවට බෑ යුතු දත්ත ප්‍රමාණයත් ක්‍රමලේඛයෙන් ම පෙන්නනව.
දැන් ඉතින් වැඩේ හරි!
මේ ක්‍රමයෙන් මම මේ ළඟඳි, යාලුවෙකුගෙන් කාලෙකට කලින් ඉල්ලගෙන තිබ්බ 2.5 GB ලිනක්ස් (Linux) මෙහෙයුම් පද්ධති තැටි පිටපතක් (disk image) ගොඩ දා ගත්ත. වැඩේට ගියෙ දත්ත 1.92 MB විතරයි!
මෙතන ඇත්තට ම සිද්ද උණේ, අපි අපි ළඟ තිබුණ දත්ත ටික අතින් දාල ටොරන්ටු ක්‍රමලේඛය රවට්ටපු එකයි. පොර හිතුවෙ ගොනුව ඇත්තට ම ජාලයෙන් බෑවිලා කියල; ඉතින් පොර අර මම කියපු විදිහට ගොනුවෙ කෑලි කෑලි වෙන වෙන ම පරීක්ෂා කරල, තමන් ම බෑවෙ නැති සහ ඇත්ත ගොනුවත් එක්ක නොගැලපෙන (වෙන විදිහකට කීවොත්, කෙළ වෙලා තියෙන) කෑලි ටික විතරක් අලුතෙන් බාගත කළා. එතකොට අවසාන ප්‍රතිඵලය වෙන්නෙ අපි ළඟ කලින් ඉඳන් තිබුණ හොඳ ටිකෙයි, නරක නිසා අලුතින් බෑවුණ හොඳ ටිකෙයි එකතුව; ඒ කියන්නෙ සමස්තය ගත්තම හොඳ ගොනුව.
සිද්ද වෙන දේ හොඳට ම පැහැදිලි කර ගන්න නම් මෙතනට ගිහින් කියවල බලන්න. (කඩ්ඩෙන් තියෙන්නෙ, හැබැයි පට්ටයි.)
No comments:
Post a Comment